السبب الحقيقي اللي مخلينا مش عارفين نحب نفسنا هو إننا فاقدين الثقة في نفسنا و فاقدين تقديرنا لذاتنا
 |
حب الذات |
تعالو نرجع شويه للماضي لأيام الطفولة كده , كنا شايفين نفسنا أزى ؟ كنا حابين نفسنا جداً ومركزين علي أجمل حاجه فينا ومكناش شايفين عيوبنا خالص كنا عايشين بفطرتنا نلبس ونخرج ونلعب ونتنطط . مكنش في تركيزنا الناس قالت ايه وحش أو حلو
وأول ما بدأ نكبر ونتعامل مع المجتمع اللي حوالينا سواء الناس أو أساليب التربيه الغلط أو العلاقات الغير صحيه ,بدأنا نشوف نفسنا بعيون تعجب الناس مش تعجبنا , بدأنا نركز علي عيوبنا أكتر من مميزاتنا
والسبب اللي وصلنا لكده هو إنشغالنا باللي حوالينا بزياده شويه ونسينا نفسنا نسينا احتياجتنا وهواياتتنا , سمحنا لنفسنا نصدق كلام سلبي إتقال علينا , صدقناه وعيشنا فيه حكايات ومشاعر توجع القلب
إحنا متولدناش بنكره نفسنا ومش حابين شكلنا , إحنا مع الأسف أكتسبنا ده من مصادر كتير حوالينا ( 6 خطوات عمليه لتحقيق حب الذات )
أسباب عدم حبك لذاتك
في أسباب كتير ممكن تخليك مش حابب نفسك وتوصل معاك لكره الذات زى مثلاّ إنك مش مُتقبل أخطاء الماضي ولا مُتقبل فكره إنك تغلط وتتعلم , ودايماً بتلوم علي نفسك في كل حاجه بلا حدود أو منطق , أو ارتباطك بشخص غير مناسب والعلاقه مكملتش وساب جواك ألم نفسي وتدني حب الذات
كونك مركز أكتر علي المثاليه وانك تكون شخص مثالي بدون أخطاء ولا عيوب في كل شيء ده في غايه التعب والاحباط لأن لا يوصف بالكمال إلا الله سبحانه وتعالي
ليه مهم نحب نفسنا
لأن ببساطه لو مصلحتش علاقتك بنفسك وحبيتها وقدرتها وطورت من نفسك وعدلت من أخطائك لنفسك مش هتنجح في علاقاتك الجديده ولا هتقدر تكون علاقه سليمه مع شريك حيات في المستقبل ,
لو عايز تنور وتزدهر كونك إنسان بص علي نفسك وحبها وتقبلها ودعمها حتي لو معندكش الشخص اللي يدعمك ويقف جنبك , محدش دايم لحد طول الوقت , حب نفسك وقوم واقع بنفسك
الفرق بين حب الذات والأنانيه
في فرق كبير بين حب الذات والأنانيه , حب الذات هو الرضا عن الذات وتقبلها في كل المراحل , هي معرفتك لنقاط قوتك ونقاط ضعفك , هي احترامك لنفسك وتعزيزك لها وعدم جلدها طول الوقت هي معرفه إمكانياتك الداخليه , بحسب نظريات علم النفس إن حب الذات من المقومات الأساسيه للشخص السوى بمعني إنك لو معرفتش تحب نفسك مش هتعرف تحب غيرك
الأنانيه ببساطه شخص بيحب كل حاجه تكون لنفسه بدون ما يراعي احتياجات اللآخرين , شخص مغرور بيطلق أحكام علي غيره بدون ما يعرفه كمان من صفاته إنه بيقلل من نجاح الآخرين .
 |
خطوات حب الذات |
1- اتعرف علي ذاتك
أول خطوه علشان تحب نفسك هو إنك تكتشف وتتعرف علي نفسك من جديد تصالح مع ذاتك وتقبل نفسك .أفهم مشاعرك وأعرف مميزاتك ونقاط ضعفك , دايماً تقضي وقت مع نفسك بدون موبايل ولا انترنت اعرف أنت بتحب ايه وبتكره ايه أعتني بنفسك واهتم بيها زى ما بتهتم وبتساعد الناس ولو كل يوم حققت أنجاز بسيط وليكن مثلاً تخلصت من عاده سيئه واكتسبت عاده جديده أو حققت هدف صغير هيفرق جداً في تقديرك لذاتك .
2- متقارنش نفسك بغيرك
ربنا خلقنا مختلفين وجعل في كل إنسان صفات معينه علشان تميزه عن غيره , أنت مهما كان شكلك وملامحك فأنت عمله نادره فريده من نوعها , اوعى تقارن نفسك بحد وتقول ليه معنديش زيه هتفقد ثقتك في نفسك وتقديرك وحب لذاتك دلع نفسك واهتم بيها واعمل كل الحاجات اللي بتحبها وبتخليك سعيد وطبعاً في نطاق الحلال
3- اسمح لنفسك تغلط وتتعلم
متوهمش نفسك بالمثاليه , الخطأ الغير مقصود مباح علشان نتعلم منه ونكتسب خبرات في الحياه الصعوبات اللي بتواجهك في وقتها هتكون صعبه لكن بعد فتره وبعد ما تنضج فكرياً هتكتشف إنك اتعلمت حاجات كتير جداّ , اسمح لنفسك إنك تغلط وتتعلم من أخطائك
4- قيمتك مش في شكلك
قيمتك طبعاً مش في شكلك ولا جسمك قيمتك في شخصيتك واحترامك وتقديرك لذاتك متسمحش لحد يهينك مهما كان ولا تصدق أي رسايل سلبيه عنك من مصدر خارجي
حب نفسك زى ما أنت وأتغير لنفسك مش علشان حد
5- عالج مخاوفك
لو بتعاني من مشاعر خوف من أي جديد أو احباط او قلق باستمرارأو خذلان من شخص ما , حاول تحدد الشعورده وتتخلص منه عن طريق طلب الدعم من مختص أو عن طريق التعلم الذاتي والقراءه . غالبا المخاوف دى بتكون عائق كبير قدامك وبتخليك واقف عند نقطه واحده في حياتك مش بتتحرك
6- اقبل نقاط ضعفك
متزعلش ومتستغربش إنك عندك نقاط ضعف , بل بالعكس اعرفها وأشتغل عليها وخليها نقطه قوه عندك , أو امشي بنظريات علم النفس الأيجابي بيقولك تركز علي نقاط قوتك أكتر من نقاط ضعفك , يعني متهملش أكتر حاجه أنت شاطر ومميز فيها وتمسك في حاجه أنت مش شاطر فيها سعتها هتحس إنك عاجزه عن فعل أى جديد وهتشعر بالاحباط , اعرف نقاط قوتك واستغلها في تحقيق إنجازاتك وفي تمارين كتير بتوضح نقاط القوه ونقاط الضعف موجوده علي الانترنت
الخلاصه
الحاجه الثابته في الحياه هي حبك واحترامك لذاتك وتقديرك لنفسك علشان تخلي كل العيون عليك ركز أكتر علي نفسك علي الداخل وليس العالم الخارجي متستناش دايماً الدعم والتشجيع والحب من الناس فقط أبدأ بنفسك في كل شيء و حبك لذاتك مهم جداً لو عايز تعيش في سلام وهدوء نفسي
جميل جدا ياكوتش ساره
ردحذفاشكرك يا مروة
حذفما شاءالله ربنا يزيدك ويوفقك دايما وينير بصيرتك ويمتعك بحسن الفهم وقوة البيان
ردحذف